20 сакавіка з'явіўся трейлер серыяла аб ансамбле "Песняры" пад назвай "За паўгадзіны да вясны". Reform.by сабраў звесткі пра кінапраэкт пра гісторыю Уладзіміра Мулявіна, стваральніка і кіраўніка ансамбля.

Ідэя праэкта з'явілася яшчэ ў 2014 годзе, калі Віктар Лабковіч (прадзюсар прыватнай «Першай КінаВідэаКампаніі») і яго калега Аляксей Трацюк (генеральны прадзюсар расійскай кінакампаніі «Yellow, Black and White», вядомая серыяламі "Кухня" і "Татавы дачкі") вырашылі стварыць фільм аб ансамблі. Толькі ў 2020 годзе пасля трох спробаў прадзюсары нарэшце атрымалі тэндар Міністэрства культуры Рэспублікі Беларусь на вытворчасць васьмісерыйнага серыяла.

Сярод галоўных партнёраў і стваральнікаў серыяла з пачатку перамогі тэндара засталіся і расійскі Першы канал, лога якога ўзнікае на пачатку трэйлера, і «Yellow, Black and White». З'явіўся таксама і анлайн-кінатэатр START, на якім будзе прэзентаваны серыял, заснаваны таксама Аляксеем Трацюком, які застаўся сярод галоўных прадзюсараў.

Сярод стваральнікаў, акрамя прадзюсараў, даволі мала беларусаў. Адзін са сцэнарыстаў - Руслан Старыкоўскі, які супрацоўнічаў у свой час з J:МОРС і Серегой. Сярод выканаўцаў можна заўважыць Максіма Шышкова, былога акцёра РТБД, а таксама іншых беларускіх артыстаў, але галоўныя ролі застаюцца за расейскімі акцёрамі. Таксама былі праведзены сустрэчы і кансультацыі як з дачкой Уладзіміра Мулявіна, Марынай, так і з музыкантамі Валерыем Дайнекам і Уладзіславам Місевічам.

Здымкі карціны ладзіліся ў Беларусі - у Мінску, Лагойску, Барысаве, і таксама ў Расіі - Маскве, Маскоўскай і Калінінградскай абласцях.

Стваральнікі серыяла ў анатацыі падкрэсліваюць "эпічнасць" і "маштабнасць", які будзе ахоплены ў праэкце. Прадзюсар Віктар Лабковіч вельмі эмацыйна пракаментаваў выхад трэйлеру ў сваім Фэйсбуку: "Гэта лепшае, што было, і будзе...". Але іншых падрабязнасцей наконт выхаду карціны, каментароў іншых стваральнікаў ці акцёраў пакуль няма.

Першая серыя з дзевяці, паводле Film.ru, з'явіцца на сайце платформы START 31 траўня.
Праглядзець трэйлер серыялу можна па спасылцы ніжэй:
YouTube: https://www.youtube.com/watch?...
Крыніца: https://reform.by/shto-vjadoma...