Пра нас

Belarusian Filmmakers’ Network – нефармальная ініцыятыва, накіраваная на развіццё беларускага незалежнага кіно, яго прасоўванне ўнутры і па-за межамі краіны, а таксама ўключэнне айчынных аўтараў у глабальны індустрыяльны кантэкст. 

Наша галоўная мэта: фармаванне дынамічнай сеткі гарызантальных крэатыўных камунікацый, вольных ад любых праяў аўтарытарнага адміністравання ды ідэйнай цэнзуры. Жаданая перспектыва - арганізацыйная, стылістычная і сэнсавая перазагрузка беларускай кінаіндустрыі.

Тры ключавыя аспекты: адкрытасьць, дэцэнтралізацыя, постправінцыйнасць.

Новая мапа беларускага кіно

Сучасная сытуацыя ў беларускім кіно выглядае катастрафічна. Наяўны палітыка-эканамічны крызіс у Беларусі супаў з крахам аўтарытарнай мадэлі культуры, пабудаванай на бюракратычным кіраванні крэатывам, палітычнай цэнзуры, стылістычным канфармізме і вечным недахопе фінансавання.

Для кінаіндустрыі гэта азначае дэвальвацыю ранейшых сэнсавых і тэхнічных матрыц. У цяперашнія часы культурнага тэрору і культурнага супраціву мы жывем у зоне перманентнай нявызначанасці, у чыстым полі новай рэальнасці.
 

Belarusian Filmmakers’ Network – калектыўны праект, адчынены для ўсіх, хто звязаны з экраннай культурай. Наша мэта - празрыстая і кіраваная еўрапеізацыя лакальнай кінаіндустрыі.

• Гэта новыя правілы кінавытворчасці: прыватызацыя, магчымасць прыватнага і замежнага інвесціравання, акцэнт на еўрапейскія калабарацыі.
• Гэта новыя мадэлі адукацыі: доўгатэрміновыя міжнародныя навучальныя праекты, адукацыйная мабільнасць, актыўная фестывальная прысутнасць.
• Гэта стылістычнае абнаўленне: пошук пост-таталітарнай экраннай стылістыкі, адмова ад пыльнай эстэтыкі соннага аграгарадка і млявага правінцыйнага гламура.
• Гэта праца на заўтрашні дзень беларускага кіно.

Мы будуем не вертыкаль улады, а гарызанталь супрацоўніцтва. Гэта наш агульны выбар - не палітычны, а прафесійны. Наш спосаб адбыцца заўважнымі і істотнымі.